மதுரை மீனாட்சியம்மன் கோயில் கும்பாபிஷேகத்தில் தரிசன அனுமதி வழங்கியதில் முறைகேடு நடந்ததாகக்கூறி மதுரை மாநகராட்சி மன்ற கூட்டத்தில் திமுக கவுன்சிலர்கள் ஆர்ப்பாட்டம் நடத்தியதால் பரபரப்பு நிலவியது.
மதுரை மாநகராட்சி மாமன்ற கூட்டம் மேயர் நாகராஜன் மற்றும் ஆணையாளர் கௌரவ்குமார் தலைமையில் நடைபெற்றது. இதில் மீனாட்சி அம்மன் கோயில் கும்பாபிஷேக விழா தொடர்பாக பிரச்னை எழுப்ப , கருப்பு நிற ஆடைகளுடன் திமுக கவுன்சிலர்கள் வந்திருந்தனர். தரிசன அனுமதி வழங்கியதில் முறைகேடு நடைபெற்றதாகக்கூறி பதாகைகளை ஏந்தி அமைச்சர் நிர்மல்குமாருக்கு எதிராக முழக்கங்கள் எழுப்பி ஆர்ப்பாட்டத்தில் ஈடுபட்டனர். மாமன்ற கூட்டத்திற்குள் ஆர்ப்பாட்டம் நடத்தக்கூடாது எனக்கூறி அவைக் காவலர்கள் மூலமாக வெளியேற்ற மேயர் உத்தரவிட்டார். அப்போது தவெக அரசு கும்பாபிஷேகத்தை சிறப்பாக நடத்தியதாக சில அதிமுக பெண் மாமன்ற உறுப்பினர்கள் குரல் எழுப்பியதால் சக அதிமுக உறுப்பினர்கள் அதிர்ச்சியடைந்தனர். தவெக அரசுக்கு ஆதரவு தெரிவித்த அதிமுக மற்றும் மதிமுக மாமன்ற உறுப்பினர்களுடன் திமுக கவுன்சிலர்கள் வாக்குவாதத்தில் ஈடுபட்டனர்.
