வடலூர் வள்ளலார் சத்தியஞான சபை பெருவெளியில் எந்தவித கட்டுமான பணிகளும் மேற்கொள்ளக் கூடாது என, அறநிலையத்துறை ஆணையரிடம் கிராம மக்கள் வாக்குவாதத்தில் ஈடுபட்டனர்.
கடலூர் மாவட்டம் வடலூர் வள்ளலார் சத்திய ஞான சபை பெருவெளி பகுதியில், 100 கோடி ரூபாய் மதிப்பில் வள்ளலார் சர்வதேச பன்னாட்டு மையம் அமைக்கப்படும் என கடந்த திமுக ஆட்சியின்போது அறிவிக்கப்பட்டது. இதை எதிர்த்து பொதுமக்கள் போராட்டம் நடத்தியதுடன், உயர்நீதிமன்றத்தில் வழக்கு தொடரப்பட்டது. இந்நிலையில், தவெக அரசு சர்வதேச பன்னாட்டு மையத்தை கைவிட்டு அப்பகுதியில் நூலகம், முதியோர் இல்லம் உள்ளிட்டவற்றை கட்டப்போவதாக நீதிமன்றத்தில் தெரிவித்திருந்தது. நாளை இதுதொடர்பான வழக்கு விசாரணைக்கு வர உள்ளது. இந்நிலையில் இந்து சமய அறநிலையத்துறை ஆணையர் வினய், வடலூர் சத்ய ஞானசபை பெருவெளி பகுதி உள்ளிட்ட இடங்களை பார்வையிட்டு புதிதாக மேற்கொள்ள உள்ள பணிகள் குறித்து ஆய்வு மேற்கொண்டார். அப்போது, பெருவெளி பகுதியில் எந்தவித கட்டுமான பணிகளும் மேற்கொள்ளக்கூடாது என, கிராம மக்கள் வாக்குவாதத்தில் ஈடுபட்டனர்.
