தமிழகத்தில் செப்டம்பர் மாதத்தில் நடந்த லஞ்ச ஒழிப்பு சோதனையில், அரசு ஊழியர்களிடம் இருந்து, ஒரு கோடியே 73 லட்சம் ரூபாய்க்கு மேல் கணக்கில் வராத பணம் மற்றும் பரிவர்த்தனைகள் கண்டறியப்பட்டுள்ளன.
கடந்த செப்டம்பர் 1-ம் தேதி முதல் 30-ம் தேதி வரை தமிழகத்தில் ஊழல் தடுப்பு மற்றும் கண்காணிப்புத் துறை சார்பில் 19 நடவடிக்கைகள் மேற்கொள்ளப்பட்டன.
இதில், அலுவல் ரீதியான பணிகளை செய்வதற்காக ஆயிரத்து 500 ரூபாய் முதல், 7 லட்சம் ரூபாய் வரை லஞ்சம் பெற்றதாக இளநிலை உதவியாளர், வணிக ஆய்வாளர் உள்ளிட்ட அரசு ஊழியர்கள் கைது செய்யப்பட்டனர்.
மேலும், தமிழகம் முழுவதும் உள்ள அரசு அலுவலகங்களில் திடீர் சோதனைகள் நடத்தப்பட்டன.
இதில், சம்பந்தப்பட்ட அலுவலகங்களில் இருந்து கணக்கில் வராத 13 லட்சத்து 78 ஆயிரத்து 207 ரூபாய் ரொக்கம் கைப்பற்றப்பட்டதாக தெரிவிக்கப்பட்டுள்ளது.
மேலும், ஒரு கோடியே 59 லட்சத்து 70 ஆயிரத்து 459 ரூபாய் அளவுக்கு ஜிபே பரிவர்த்தனைகள் கண்டறியப்பட்டுள்ளன.
இதன்மூலம் மொத்தம், ஒரு கோடியே 73 லட்சத்து, 48 ஆயிரத்து 666 ரூபாய் அளவுக்கு கணக்கில் வராத பணம் மற்றும் பரிவர்த்தனைகள் கண்டறியப்பட்டதாக தெரிவிக்கப்பட்டுள்ளது.
