மருத்துவர்களின் சேவை சமூகத்தின் விளிம்பு நிலையில் உள்ள கடைசி மனிதனையும் சென்றடைய வேண்டும் என மத்திய அமைச்சர் எல்.முருகன் வலியுறுத்தியுள்ளார்.
கோவை சூலூரில் உள்ள தனியார் பல் மருத்துவக் கல்லூரி பட்டமளிப்பு விழாவில் மத்திய அமைச்சர் எல்.முருகன் சிறப்பு விருந்தினராக பங்கேற்றார். அப்போது பேசிய அவர், மருத்துவர்கள் நோயாளிகளை குடும்ப உறுப்பினர்களாகக் கருதி மனிதநேயத்துடன் சிகிச்சையளிக்க வேண்டும் என்றார்.
கிராமப்புறங்கள் மற்றும் பழங்குடியினப் பகுதிகளுக்கும் இளம் மருத்துவர்கள் நேரடியாகச் சென்று மருத்துவ முகாம்கள் நடத்த வேண்டும் என அறிவுறுத்தினார்.
மேலும், செயற்கை நுண்ணறிவு உள்ளிட்ட நவீன தொழில்நுட்பங்கள் மருத்துவர்களுக்கு துணையாக இருக்குமே தவிர, மனிதநேயத்திற்கு மாற்றாக முடியாது என்றும் தெரிவித்தார்.
கடந்த 2014-ம் ஆண்டை ஒப்பிடும்போது நாட்டில் எய்ம்ஸ் மருத்துவமனைகள், மருத்துவக் கல்லூரிகள் மற்றும் மருத்துவ இடங்கள் அதிகரித்துள்ளதாகவும் மத்திய அமைச்சர் எல்.முருகன் தெரிவித்தார்.
