திரிணாமூல் காங்கிரஸ் கட்சியில் ஏற்பட்ட உள்கட்சி பூசலால் அக்கட்சியின் பெயர் மற்றும் சின்னத்தை தேர்தல் ஆணையம் முடக்கிய நிலையில், அக்கட்சி அதன் அடையாளத்தை இழந்து நிற்கிறது. இந்தச் சூழலில் மம்தா பானர்ஜி ஆதரவு வேட்பாளர் ஒருவர் இடைத்தேர்தலில் இருந்து பின்வாங்கிய 3 மணிநேரத்தில், மீண்டும் போட்டியிடுவதாக அறிவித்தது அம்மாநில அரசியல் களத்தை சூடாக்கியுள்ளது. இதுகுறித்து விரிவாக பார்க்கலாம்…
மேற்குவங்கத்தில் கடந்த ஏப்ரலில் நடைபெற்ற சட்டப் பேரவைத் தேர்தலில் மம்தா பானர்ஜி தலைமையிலான திரிணாமூல் காங்கிரஸ் கட்சி, படுதோல்வியை சந்தித்ததால், மம்தாவுக்கு எதிராக ரிதபிரத பானர்ஜி தலைமையில், மூன்றில் இருபங்கு எம்எல்ஏக்கள் போர்க்கொடி உயர்த்தி, தனி அணியாக செயல்பட்டு வருகின்றனர்.
இந்தச் சூழலில் மேற்கு வங்க முதலமைச்சர் சுவேந்து அதிகாரி போட்டியிட்டு வென்ற 2 தொகுதிகளில் ஒன்றான நந்திகிராம் தொகுதியிலும், ஆம் ஜனதா உன்னாயன் கட்சித் தலைவர் வென்ற ரெஜிநகர் தொகுதிக்கும் அடுத்த மாதம் 6-ஆம் தேதி இடைத்தேர்தல் நடைபெறுகிறது.
தேர்தலுக்கு இன்னும் சில நாள்களே நிலையில், உள்கட்சி பூசல் காரணமாக திரிணாமூல் காங்கிரஸ் கட்சியின் பெயரையும், மலர் சின்னத்தையும் தேர்தல் ஆணையம் முடக்கியது. மேலும், மம்தா பானர்ஜி அணிக்கு “மம்தா அகில இந்திய திரிணாமூல் காங்கிரஸ்” என்ற பெயருடன், கால்பந்து சின்னத்தையும், அதிருப்தி அணிக்கு “ஜனநாயக திரிணாமூல் காங்கிரஸ்” என்ற பெயருடன் அஞ்சல் உறையையும் சின்னமாக தேர்தல் ஆணையம் அளித்திருக்கிறது.
இது, ஏறத்தாழ 28 ஆண்டுகளாக கட்சியைக் கட்டி ஆண்ட மம்தா பானர்ஜிக்கு பெரும் பின்னடைவை ஏற்படுத்தியிருக்கிறது.
புதிய பெயர் மற்றும் சின்னத்துடன் தேர்தலில் களம் காண்பது கடினம் என்பதை உணர்ந்த மம்தா பானர்ஜி, இடைத்தேர்தலில் காங்கிரஸ் கட்சிக்கு ஆதரவு அளிப்பதாக அறிவித்தார். இதனால் ரெஜிநகர் தொகுதியில் வேட்புமனு தாக்கல் செய்த மம்தா ஆதரவு வேட்பாளரான ரபியுல் ஆலம் செளத்ரி, தனது வேட்புமனுவை திரும்ப பெற வேண்டிய சூழல் ஏற்பட்டது.
மம்தா பானர்ஜியுடன் தொலைபேசியில் பேசி அவரது ஆலோசனையின்பேரில் தான் வேட்புமனுவை வாபஸ் பெற்றதாக செய்தியாளர்களிடம் கூறிய ரபியுல் ஆலம், அடுத்த 3 மணிநேரத்தில் மீண்டும் தேர்தலில் போட்டியிடுவதாக அறிவித்து கட்சித் தலைமைக்கு அதிர்ச்சியை அளித்துள்ளார்.
மம்தா பானர்ஜியின் தீவிர விசுவாசியான ரபியுல் ஆலமின் இந்த முடிவு, காங்கிரஸுக்கும் பெரும் தலைவலியை ஏற்படுத்தியிருக்கிறது.
இது ஒருபுறமிருக்க 19 ஆண்டுகளுக்கு முன்பு நடைபெற்ற கொலை வழக்கில், நந்திகிராம் தொகுதியில் மம்தா அணி சார்பில் களமிறங்கி, பின்னர் வேட்புமனுவை வாபஸ் பெற்ற சஞ்சிதா பிரதான் டே (Sanchita Pradhan Dey) என்ற பெண் வேட்பாளரை போலீசார் அதிரடியாக கைது செய்தனர்.
முன்னதாக மேற்குவங்க முதலமைச்சர் சுவேந்து அதிகாரியை சஞ்சிதா சந்தித்து பேசியது, அம்மாநில அரசியலில் புயலைக் கிளப்பியது. மரியாதை நிமித்தமாக இந்தச் சந்திப்பு நடைபெற்றதாக சஞ்சனா தரப்பில் சொல்லப்பட்டாலும், அவர் கடைசி நேரத்தில் வேட்புமனுவை வாபஸ் பெற்றதற்கு இந்தச் சந்திப்பும் ஒரு காரணமாக அமைந்திருக்கலாம் என மம்தா கருதினார்.
இதனால்தான், எந்த காங்கிரஸை எதிர்த்து 28 ஆண்டுகளுக்கு முன் திரிணாமூல் காங்கிரஸை மம்தா தொடங்கினாரோ, இன்றைக்கு அதே காங்கிரஸ் கட்சியிடம் சரணாகதி அடைந்து, நந்திகிராம் தொகுதியில் காங்கிரஸ் வேட்பாளர் மிலான் பிரதானுக்கு ஆதரவு அளிப்பதாக தெரிவித்திருக்கிறார்.
நந்திகிராமில் இந்த நிலைமை என்றால், ரெஜிநகரில் மம்தாவின் உத்தரவை மீறி, ரபியுல் ஆலம் மீண்டும் தேர்தல் களம் புகுந்திருக்கிறார். ஏற்கெனவே இண்டி கூட்டணியின் தலைமை பொறுப்புக்கு சரத் பவாருடன் சேர்ந்து மம்தாவின் பெயரும் அடிபட்ட நிலையில், அவரது மாறுபட்ட செயல்பாடு காங்கிரஸுக்கு தீராத தலைவலியை ஏற்படுத்தியிருக்கிறது.
