தமிழர்கள் தமிழுடன் சேர்த்து இந்தியையும் கற்க வேண்டும்: அமித்ஷா வலியுறுத்தல்!

தமிழர்கள் தாய்மொழியான தமிழுடன் சேர்த்து இந்தியையும் கற்க வேண்டும் என்று மத்திய உள்துறை அமைச்சர் அமித்ஷா வலியுறுத்தி இருக்கிறார்.

குஜராத் மாநிலம் அகமதாபாத் நகரிலுள்ள இந்திய ஆசிரியர்கள் கல்வி நிறுவனத்தின் பட்டமளிப்பு விழா நேற்று மாலை நடந்தது. இவ்விழாவில் கலந்துகொண்ட மத்திய உள்துறை அமைச்சர் அமித்ஷா, மாணவர்களுக்கு பட்டம் வழங்கி பேசுகையில், “நான் ஆங்கிலத்துக்கு எதிரானவன் அல்ல. ஏனெனில், எந்தவகையான அறிவையும் புறக்கணிக்காத நாடாக இந்தியா இருக்கிறது. ஆகவே, ஆங்கிலத்துடன் சேர்த்து ஜெர்மன், ப்ரெஞ்ச் போன்ற மொழிகளையும் குழந்தைகள் கற்றுக்கொள்ள வேண்டும்.

அதேபோல, குஜராத் குழந்தைகள் குஜராத்தியுடன் இந்தியையும், அஸ்ஸாம் குழந்தைகள் அஸ்ஸாம் மொழியுடன் இந்தியையும், தமிழர்கள் தமிழ்மொழியுடன் இந்தியையும் சேர்த்து கற்றுக்கொள்ள வேண்டும். இது நடந்தால் நம் நாடு முன்னேறுவதை யாராலும் தடுக்க முடியாது. மேலும், இந்த 4 பாடங்களுடன் சமஸ்கிருத மொழியும் கற்றுத்தரப்படுகிறது. இதையும் மாணவர்கள் கூடுதலாக கற்றுக்கொள்ள வேண்டும்.

ஏனெனில், உலகம் முழுவதிலும் உள்ள அறிவுக்களஞ்சியம் நமது வேதங்கள், உபநிடதங்கள் மற்றும் சமஸ்கிருதம் மட்டும்தான். இதை கற்பவர்கள் வாழ்க்கையில் எந்தப் பிரச்னை வந்தாலும், அது ஒரு பிரச்னையாகவே இருக்காது. காரணம், அறிவு எங்கிருந்து வந்தது என்பதுப் பற்றி சிந்திக்காமல் நல்ல எண்ணங்களை உள்வாங்க வேண்டும் என்று வேதங்கள் போதிக்கின்றன.

அறிவு எங்கிருந்து வந்தாலும், அது நம் சமுதாயம், மக்கள், உலகம் மற்றும் பிரபஞ்சத்தின் நலனுக்கானதா என்பதை பார்க்க வேண்டும். அதில் நவீன பரிமாணத்தையும் சேர்க்க வேண்டும். அறிவு மற்றும் அறிவியல் துறையில் நிறைய மாற்றங்கள் ஏற்பட்டிருக்கின்றன. இவற்றை புரிந்துகொண்டு இரண்டையும் ஒருங்கிணைத்து முழுமையான கல்வி முறையை உருவாக்க வேண்டும்.

எல்லாவற்றுக்கும் மேலாக, நம் வரலாறு, இலக்கணம், இலக்கியங்கள் தாங்கியுள்ள தாய்மொழியை பாதுகாப்பது உங்களது கடமையாகும். இதனால்தான், புதிய கல்விக்கொள்கை 2020-ல் குழந்தைகளுக்கு தாய்மொழியை பயிற்றுவிக்க முக்கியத்துவம் அளிக்கப்பட்டிருக்கிறது” என்றார்.