கடந்த சில நாட்களுக்கு முன்பு திருப்பதி திருமலை கோவிலுக்கு செல்லும் பாதையில் சிறுத்தை தாக்கி 6 வயது சிறுமி உயிரிழந்தது பெரும் சோகத்தை ஏற்படுத்தியது.
இந்நிலையில் திருமலையில் பக்தர்கள் மலையேறி செல்லும் பாதைகளில் சிறுத்தைகள், கரடிகள் நடமாட்டம் இருப்பதை அங்கு கண்காணிப்பு கேமராக்கள் பொருத்தப்பட்டது. இதனிடையே கண்காணிப்பு கேமரா பதிவுகளில் சிறுத்தை , கரடிகள் நடமாட்டம் இருப்பது உறுதியாகியுள்ளது. எனவே இவற்றைப் பிடிக்க 6 இடங்களில் கூண்டுகள் வைக்கப்பட்டுள்ளதாக வனத்துறையினர் தெரிவித்தனர்.
இதுபோன்ற சம்பவங்கள் தொடர்ந்து நிகழ்வதால் மலைப்பாதையில் பக்தர்களின் பாதுகாப்பு தொடர்பாக திருப்பதி தேவஸ்தானத்திற்கு எதிராக விமர்சனங்கள் எழுந்தன.
இதைத்தொடர்ந்து, புதிய அறங்காவலராக பதவியேற்ற திருப்பதி சட்டமன்ற உறுப்பினரான கருணாகர் ரெட்டி, திருமலைக்கு மலையேறி செல்லும் பக்தர்களுக்குக் கைத்தடி வழங்கும் திட்டத்தை அமல்படுத்தினார்.
அலிபிரி மலைப்பாதையில் 7-வது மைல், லட்சுமி நரசிம்மர் கோயில் பகுதிகளில் 320 கண்காணிப்பு கேமராக்கள் பொருத்தப்பட்டு, 24 மணி நேரமும் கண்காணிக்கப்பட்டு வருகிறது. சிறுத்தை பீதியால் அலிபிரி, ஸ்ரீவாரி மெட்டு ஆகிய இரு மலைப்பாதைகளிலும் பக்தர்களின் வருகை வெகுவாக குறைந்துள்ளது.
இந்நிலையில், திருமலையில் இருந்து திருப்பதிக்கு வரும் மார்க்கத்தில் ‘எலிபஃன்ட் காட்’ பகுதியில் சிறுத்தைகளின் நடமாட்டத்தை கண்காணிப்பு கேமரா மூலம் வனத் துறையினர் கண்டறித்துள்ளனர். மேலும், திருமலையில் உள்ள இணை நிர்வாக அதிகாரி அலுவலகத்தின் பின்புறம் கரடி ஒன்றின் நடமாட்டத்தையும் அவர்கள் அறிந்துள்ளனர்.
இதுதவிர ஸ்ரீவாரி மெட்டு மார்க்கத்திலும் சிறுத்தை நடமாட்டம் இருப்பதைக் கண்காணிப்பு கேமரா பதிவு செய்துள்ளது. திருமலைக்குப் பக்தர்கள் செல்லும் வழிகளில் வனவிலங்குகள் நடமாட்டம் இருப்பது உறுதியானதைத் தொடர்ந்து இவற்றைப் பிடிக்க 6 இடங்களில் கூண்டுகள் வைத்து தொடர்ந்து கண்காணித்து வருவதாக வனத்துறையினர் தெரிவித்தனர்.
