சத்தீஸ்கரில் முதல்வர் பூபேஷ் பாகேல் தலைமையில் காங்கிரஸ் ஆட்சி நடக்கிறது. இங்கு இந்த ஆண்டு இறுதியில் இங்கே சட்ட சபை தேர்தல்நடைபெற உள்ளது.
‘நாங்கள் கேட்டதையெல்லாம் எந்த ஒரு பாரபட்சமும் இல்லாமல் பிரதமர் மோடி செய்து கொடுத்துள்ளார். கேட்காததையும் அள்ளி அள்ளிக் கொடுத்துள்ளார்,” என, அரசு விழாவில், பிரதமர் நரேந்திர மோடியை, காங்கிரஸ் கட்சியின் சத்தீஸ்கர் துணை முதல்வர் டி.எஸ்.சிங் தியோ புகழாரம் சூட்டியுள்ளார் .
கடந்த சில நாட்களுக்கு முன் சத்தீஸ்கர் மாநிலத்தில், 6,400 கோடி ரூபாய் மதிப்புள்ள மக்கள் நலத் திட்டங்களைப் பிரதமர் மோடி தொடங்கி வைத்தார். இந்த நிகழ்ச்சியில், காங்கிரஸ் கட்சியின் மூத்த தலைவரும், மாநிலத்தின் துணை முதல்வருமான டி.எஸ். சிங் தியோ கலந்து கொண்டார்.
நிகழ்ச்சியில் பேசிய அவர், பிரதமர் நரேந்திர மோடியைப் பாராட்டிப் பேசியது பரபரப்பை ஏற்படுத்தியுள்ளது.
“நீங்கள் இங்கு எங்களுக்கு நிறைய கொடுப்பதற்காக வந்துள்ளீர்கள். அதற்காக உங்களை வரவேற்கிறேன்.சத்தீஸ்கருக்கு நீங்கள் ஏற்கனவே பல திட்டங்களைக் கொடுத்துள்ளீர்கள். எதிர்காலத்திலும், இதுபோல் அள்ளி அள்ளி தருவீர்கள் என நம்புகிறேன்.
மத்திய அரசின் வழிகாட்டுதலின்படி, நாங்கள் நிறைய மக்கள் நலத்திட்டங்களைச் செயல்படுத்தியுள்ளோம்.
என்னுடைய இத்தனை ஆண்டு அரசியல் அனுபவத்தில், இதுபோன்று பாரபட்சம் இல்லாமல் மத்திய அரசு செயல்பட்டதைப் பார்த்ததில்லை. எங்கள் மாநிலத்துக்கு இது இது தேவை என்று மத்திய அரசிடம் கேட்டால், உடனே அதற்கு மறுப்பு தெரிவிக்காமல், நிதியை ஒதுக்கி தந்துள்ளனர். மத்திய மற்றும் மாநில அரசுகள் இணைந்து செயல்பட்டால், மாநிலமும், நாடும் முன்னேறும் என்பதில் எந்தவித சந்தேகமும் இல்லை.” என்று துணை முதல்வர் டி.எஸ். சிங் தியோ பேசினார்.
