உத்தரப் பிரதேச மாநிலம் எட்டாவா பகுதி அருகே புதுடெல்லி-தர்பாங்கா சிறப்பு எக்ஸ்பிரஸ் இரயிலில் ஏற்பட்ட தீவிபத்தில் 3 பெட்டிகள் எரிந்து நாசமாகின.
புதுடெல்லியில் இருந்து உத்தரப் பிரதேச மாநிலம் வழியாக பீகார் மாநிலத்துக்கு புதுடெல்லி-தர்பாங்கா சிறப்பு எக்ஸ்பிரஸ் இரயில் இயக்கப்பட்டு வருகிறது. இந்த இரயில் வழக்கம்போல நேற்று புதுடெல்லியில் இருந்து புறப்பட்டு பீகார் மாநிலத்தை நோக்கிச் சென்று கொண்டிருந்தது.
உத்தரப் பிரதேச மாநிலம் எட்டாவா பகுதி அருகேயுள்ள சாராய்போபட் எனும் இரயில் நிலையத்தைக் கடந்து சென்றபோது, திடீரென இரயிலில் இருந்து புகை வந்தது. இதைக் கண்ட இன்ஜின் டிரைவர், உடனடியாக இரயில் நிலைய அதிகாரிகளுக்கு தகவல் கொடுத்துவிட்டு, அவசர அவசரமாக இரயிலை நிறுத்தினார்.
பின்னர், இரயிலில் இருந்து பயணிகள் உடனடியாக வெளியேற்றப்பட்டனர். ஆயினும், இச்சம்பவத்தில் 4 பயணிகள் காயமடைந்ததாகக் கூறப்படுகிறது. தொடர்ந்து, தீயணைப்பு வீரர்கள் வந்து தீயை கட்டுக்குள் கொண்டு வந்தனர். எனினும், இத்தீவிபத்தில் 3 இரயில் பெட்டிகள் எரிந்து நாசமாகி விட்டன.
இத்தீவிபத்து குறித்து எட்டாவா காவல்துறை கண்காணிப்பாளர் சஞ்சய் குமார் கூறுகையில், “டெல்லியில் இருந்து பீகார் நோக்கிச் சென்றுக் கொண்டிருந்த இரயிலில் 3 பெட்டிகளில் தீ விபத்து ஏற்பட்டிருக்கிறது. சம்பவ இடத்திற்கு விரைந்து வந்த தீயணைப்பு வீரர்கள் தீயை கட்டுக்குள் கொண்டு வரும் முயற்சியில் ஈடுபட்டனர்.
மேலும், ஆம்புலன்ஸ் மற்றும் மருத்துவக் குழுவினர் சம்பவ இடத்தில் உள்ளனர். இச்சம்பவத்தில் 4 பயணிகள் காயங்களுடன் மீட்கப்பட்டுள்ளனர். ஆனால், அவை தீக்காயங்களாகத் தெரியவில்லை என்பது முதற்கட்ட விசாரணையில் தெரியவந்திருக்கிறது. தீ விபத்துக்கான காரணம் குறித்து விசாரணை நடைபெற்று வருகிறது” என்றார்.
அதேசமயம், ஒரு பெட்டியில் மட்டுமே தீப்பிடித்ததாக வட மத்திய இரயில்வே நிர்வாகம் தெரிவித்திருக்கிறது. இதுகுறித்து வட மத்திய இரயில்வே தலைமை மக்கள் தொடர்பு அதிகாரி ஹிமான்ஷு உபாத்யாய் கூறுகையில், “புதுடெல்லி-தர்பாங்கா சிறப்பு எக்ஸ்பிரஸ் இரயிலில் எஸ்-1 பெட்டியில் இருந்து புகை வெளியேறுவதை சாராய்போபட் சந்திப்பில் உள்ள காவலர் கவனித்திருக்கிறார்.
பின்னர், இரயில் உடனடியாக நிறுத்தப்பட்டு பயணிகள் அனைவரும் வெளியேற்றப்பட்டனர். தொடர்ந்து, தீயணைப்பு வீரர்கள் விரைந்து வந்து தீயை அணைத்தனர். பயணிகள் அனைவரும் பாதுகாப்பாக உள்ளனர். தற்போது வரை உயிர்ச்சேதம் குறித்து எந்த தகவலும் இல்லை” என்று கூறியிருக்கிறார்.
