இலங்கைக் கடற்படையால் கைது செய்யப்பட்ட மீனவர்களை விடுவிக்க நடவடிக்கை எடுக்குமாறு வெளியுறவுத்துறை அமைச்சர் ஜெய்சங்கருக்கு முதலமைச்சர் ஸ்டாலின் வேண்டுகோள் விடுத்துள்ளார்.
கடந்த 25-ம் தேதி ராமேஸ்வரம் மீன்பிடித் துறைமுகத்தில் இருந்து தமிழகத்தைச் சேர்ந்த 32 மீனவர்கள் மற்றும் கேரளாவைச் சேர்ந்த 2 மீனவர்கள் கடலுக்குச் சென்றனர்.
அப்போது எல்லை தாண்டி மீன்பிடித்ததாக கூறி தனுஷ்கோடி அருகே 34 பேரையும் அவர்களது 3 படகுகளையும் இலங்கை கடற்படை சிறைபிடித்தது. இதுதொடர்பாக மத்திய அமைச்சர் ஜெய்சங்கருக்கு முதலமைச்சர் ஸ்டாலின் எழுதியுள்ள கடிதத்தில், மீனவர்கள் அடிக்கடி சிறைபிடிக்கப்படும் சம்பவங்கள் அவர்களின் எதிர்காலத்தை இருண்டதாக ஆக்கியுள்ளது எனக் குறிப்பிட்டுள்ளார்.
இலங்கை கடற்படையினரால் மீனவர்கள் கைது செய்யப்படுவதை தடுக்க உறுதியான தூதரக நடவடிக்கைகள் எடுக்க வேண்டியது அவசியம் எனக் கூறியுள்ள முதலமைச்சர், கைது செய்யப்பட்ட மீனவர்கள் மற்றும் அவர்களது படகுகளை விடுவிக்க அவசர நடவடிக்கை எடுக்க வேண்டும் எனவும் வலியுறுத்தியுள்ளார்.
