பாரதத்தின் ஆன்மீக கலாச்சாரத்தின் அடையாளமாக விளங்கவிருக்கும் அயோத்தி ஶ்ரீராமர் கோவில் கும்பாபிஷேக விழா, வரும் ஜனவரி 22 அன்று நடைபெற உள்ளது.
கடந்த 2020 ஆம் ஆண்டு ஆகஸ்ட் மாதம், பாரதப் பிரதமர் மோடி அடிக்கல் நாட்டி தொடங்கி வைத்த கோவில் திருப்பணிகள் நிறைவடைந்து, வரும் 22 -ம் தேதி அன்று பிரதமர் மோடியின் திருக்கரங்களால் திறந்து வைக்கப்பட உள்ளது.
இந்த நிலையில், பகவான் ஶ்ரீராமர் கோவில் கும்பாபிஷேகம், பாரதத்தின் ஒட்டுமொத்த மக்களுக்கும் மற்றுமொரு தீபாவளிப் பண்டிகையாக இருக்கும் வகையில், அன்றைய தினம் நாட்டு மக்கள் அனைவர் இல்லங்களிலும் தீபங்கள் ஏற்றிக் கொண்டாட வேண்டும் என பிரதமர் மோடி கேட்டுக்கொண்டுள்ளார்.
அந்த வகையில், பிரதமர் அறிவுரையின்படி, கும்பாபிஷேகப் பெருவிழாவில், நாடு முழுவதும் உள்ள பக்தர்கள் கலந்து கொள்ள அழைப்பிதழ் வழங்கும் பணி நடந்து வருகிறது.
சென்னையில், தமிழக பாஜக தலைவர் அண்ணாமலை இல்லத்தின் அருகில் வசிப்பவர்களின் இல்லங்களுக்கு நேரில் சென்று, ஸ்ரீராமர் கோவில் கும்பாபிஷேக அழைப்பிதழ் வழங்கினார்.
இதனிடையே, தமிழக ஆளுநர் மாளிகையில் ஆளுநர் ஆர்.என்.ரவிக்கு, ஆர்.எஸ்.எஸ் சென்னை மாநகரத் தலைவர் ஸ்ரீ. சந்திர சேகர் மற்றும் விஸ்வ ஹிந்து பரிஷத் மாநிலத் தலைவர் ஸ்ரீ. ஆண்டாள் சொக்கலிங்கம் ஆகியோர் குடும்பத்துடன் சென்று அயோத்தி ஸ்ரீ ராமஜென்ம பூமி கும்பாபிஷேக அழைப்பிதழ், ஸ்ரீ ராமர் கோவில் படம் மற்றும் அட்சதையை கொடுத்தனர்.
அதனை ஆளுநர் ஆர்.என்.ரவி, பயபக்தியுடன் பெற்றுக் கொண்டார். நாடு முழுவதும், அயோத்தி ஸ்ரீராமர் கோவில் கும்பாபிஷேக அழைப்பிதழ் கொடுக்கும் பணி வேகம் அடைந்துள்ளது.
